Мемлекет басшысының Жарлығына сәйкес еліміздің 20-дан астам мұғалімдері білім беру саласына сіңірген айрықша еңбегі үшін мемлекеттік наградамен марапатталды.
ҚР Білім және ғылым министрі Асхат Аймағамбетов Нұр-Сұлтан қаласының № 9 «Зерде» мамандандырылған мектебінің мұғалімі Гүлназия Байуловаға «Қазақстанның еңбек сіңірген ұстазы» құрметті атағын табыс етіп, атқарған қызметіне алғыс білдірді.
Гүлназия Байулова география пәнінің мұғалімі, санаты — «педагог-шебер». Білім саласында 40 жылдан аса уақыт қызмет атқаруда.
Бүгінгі күнге дейін «Қазақстан Республикасы білім беру ісінің құрметті қызметкері» төсбелгісі, Қазақстан Республикасы Білім және ғылым министрлігінің «Құрмет» грамотасы, «Географиядан республикалық атаулы мектептің 25 жыл мерейтойлық» медалі, «Бейбітшілік әлемі» Халықаралық қазақ творчестволық бірлестігінің «Ыбырай Алтынсарин» медалі, «Дарын» республикалық ғылыми- практикалық орталығының «Құрмет» грамотасымен және басқа да ұйымдардың алғыс хаттарымен марапатталған.
Гүлназия Сабырқызы 7-11 сыныптарға арналған «Географиядан олимпиадалық танымдық тапсырмалар» оқу-әдістемелік құралының авторы. Аталған оқу-әдістемелік құралы қазіргі уақытта республика бойынша таратуға ұсынылған.
«Зерде» мектебінің Қазақстан Республикасы Білім және ғылым министрлігінің «Ең үздік жаңашыл мектеп», республика бойынша «Үздік – 100 мектеп» және мамандандырылған «Үздік – 10 мектеп» қатарынан көрінуіне және оқушылардың халықаралық, республикалық деңгейдегі жетістіктеріне мол тәжірибесімен, біліктілігімен өзіндік үлесін қосып келе жатқан іскер педагог.
Шәкірттерінің сапалы білім алуын басты назарда ұстап, мектеп түлектерінің еліміздің, алыс және жақын шетелдің жоғары оқу орындарында және Назарбаев Университетіне түсіп, түлектердің жоғары көрсеткішке жетуіне өз үлесін қосқан.
Ол дарынды оқушыларға білім беру мен тәрбиелеуде өзіндік сара жолы бар, күш-жігері мен ізденісі мол, кәсіби шеберлігі шыңдалған, беделді де білікті маман екенін атап өткен жөн.
Гүлназия Сабырқызын Нұр-Сұлтан қаласының «Әділет» білім беру қызметкерлері кәсіподағының атынан наградасымен құттықтай отырып, қызметіне толағай табыстар тілейміз!