«Қарты бар үйдің қазынасы бар» деп бекер айтпаса керек. Себебі шаңырақтың шаттығы, берекесі мен бірлігі осы данагөй қарияларымызбен нығаяды, діңгегі мықты болады. Олардан алған тәлім-тәрбие негізі кейінгі ұрпаққа үлгі-өнеге, адастырмас жол десек артық айтпаймыз.
Осы ретте Нұр-Сұлтан қаласының «Әділет» білім беру қызметкерлерінің кәсіподағы Нұр-Сұлтан қаласының Білім басқармасымен бірлесіп Қарттар күні қарсаңында педагогикалық еңбек ардагерлерімен кездесу өткізді.
Елордалық Білім басқармасының басшысы Сейсенбай Шәкәрім Толыбайұлы ардагерлерге салынып жатқан білім беру нысандары, білім жүйесінің міндеттері мен мәселелері, білім беруді дамытудағы алдағы жоспарларымен таныстырды. Ардагерлерге атқарған қызметтері үшін шексіз ризашылығын білдіріп, оларға зор денсаулық және ұзақ өмір тіледі.
Сондай -ақ, «Әділет» Кәсіподақ ұйымының төрағасы Әлиев Батыр Әлиұлы барша ардагер-ұстаздарды қарттар күнімен құттықтап, білім беру саласындағы еңбектері мен жас ұрпақты тәрбиелеуге қосқан үлестері үшін алғысын білдірді.
Кездесу № 1 Балалар музыка мектебінде өтті. Ардагерлер аталған мектептің жұмысымен танысып, жұмыстарына сәттілік тіледі. Кездесу барысында ардагерлерге мерекелік концерт ұйымдастырылды.
Ардагерлермен жұмысты жандандыру, оларды әлеуметтік қолдау мен қорғауды қамтамасыз ету мақсатында білім беру жүйесінің ардагерлер кеңесінің қызметін үйлестіру үшін Нұр-Сұлтан қаласының Білім басқармасы «Әділет» Кәсіподағымен бірлесіп Нұр-Сұлтан қаласының білім беру жүйесінің ардагерлер кеңесін құрғанын атап өткіміз келеді.
Білім басқармасы басшысының бұйрығына сәйкес Кеңестің төрағасы болып Балташева Амантай Сакеновна, ал орынбасары болып Наурузбаева Балсулу Музаппаровна тағайындалды.
Кеңестің мақсаты - Нұр-Сұлтан қаласының білім беру жүйесінің ардагерлерін әлеуметтік қорғау және әлеуметтік кепілдіктермен қамтамасыз етуге ықпал ету; білім саласындағы ұйымдар мен мекемелердің қоғамдық шараларына білім беру жүйесінің ардагерлерін тартуға жағдай жасау; жастарды тәрбиелеуде, педагогикалық дәстүрлерді сақтау мен дамытуда білім беру жүйесінің ардагерлерінің рөлін арттыру; жалғызбасты, мұқтаж ардагерлерге қайырымдылық көмек көрсетуге ықпал ету; ардагерлерді мемлекеттік мерекелерде және мерейтойларда марапаттау; зейнет жасына жеткен білім беру қызметкерлерінің құқықтары мен әлеуметтік кепілдіктерінің сақталуын бақылауды ұйымдастыру.
Барлық педагогикалық еңбек ардагерлері Білім басқармасы мен «Әділет» Кәсіподақ ұйымына, № 1 Балалар музыка мектебінің қызметкерлеріне ризашылықтарын білдірді.
Іс -шараны жоғары деңгейде ұйымдастыруға ықпал еткені үшін № 1 Балалар музыка мектебінің директоры Болат Кыдырманов Сапабекұлына және ұжымға алғысымызды білдіреміз.
.jpeg)
